ଗଛ ପରା ରତନ
ଜ୍ୟୋତ୍ସ୍ନା ରାଣୀ ଦେବୀ
ଚକାଚକା ଭଉଁରୀ
ମାମୁଘର ଚଉଁରୀ
ନିତିନିତି ଗଛମୂଳେ ପାଣି ଦିଏ ଗଉରୀ ।
ଗଛ ଉଠିଉଠିକା
ଫୁଲ ଫୁଟିଫୁଟିକା
ମହମହ ବାସୁଥାଏ ଆମ ଟିକି ବଗିଚା ।
ଖରାବେଳେ ଖୁସିରେ
ଗଛମୂଳେ ବସିରେ
କେତେକେତେ ମଜାଗପ କରୁ ହସିହସିରେ ।
ଫଳେ ଆମ୍ଵ ,ପିଜୁଳି
ଲେମ୍ଵୁ ,ଲଙ୍କା ,କଦଳୀ
କମଳା ଅମୃତଭଣ୍ଡା ପାଚି ରହେ ଓହଳି ।
ଦେଲେ ସାର ପିଡିଆ
ଗଛ ହେବ ବଢିଆ
ତୋଳୁଥିବା ଝୁଡିଝୁଡି କେତେ ଗୁଆ ନଡିଆ ।
ମଲ୍ଲୀ, ହେନା,ସେବତୀ
ଗେଣ୍ଡୁ ,ଜୁଇ, ମାଳତୀ
ଫୁଟି ହସି ବାସୁଥିବେ ଚମ୍ପା ଆଉ କେତକୀ ।
ପ୍ରଜାପତି ବୁଲିବ
ମହୁମାଛି ଫୁଲିବ
ଗୁଣୁଗୁଣୁ ଗୀତ ଗାଇ ଲତାଗଛେ ଝୁଲିବ ।
ପରିବେଶ ଶୋହିବ
ସବୁ ମନ ମୋହିବ
ରୋଗଶୋକ ଦୂରେ ଯିବ ଶୁଦ୍ଧ ବାଆ ବହିବ ।
ଗଛ ପରା ରତନ
ନେବା ଆମେ ଯତନ
ହସିହସି ଦିନ ଯିବ ପୂରାହେବ ସପନ ।
ବ୍ରହ୍ମପୁର, ଗଂଜାମ